Цените на нафтата денеска на меѓународните пазари забележаа пад под границата од 80 долари, паралелно со сигналите за забрзани барања на земјите од Персискиот Залив за мировно решение околу Ормутскиот теснец.
На лондонскиот пазар, цената на барелот се намали за 3,85 долари во споредба со претходното затворање и изнесуваше 79,92 долари, додека на американскиот пазар цената падна за 4,16 долари, спуштајќи се на 76,18 долари.
Смирувањето на пазарите следи откако САД се откажаа од новиот бран напади врз иранската енергетска инфраструктура. Американскиот претседател Доналд Трамп истакна дека сака да даде повеќе време на дипломатијата, посочувајќи ги како „добри“ разговорите со Техеран.
Од друга страна, портпаролот на иранското Министерство за надворешни работи, Есмаил Багеи, појасни дека Техеран во моментов не преговара со САД, туку води разговори исклучиво со Оман за воспоставување привремена безбедна рута низ Ормутскиот теснец.
Неименуван висок ирански функционер за Ројтерс изјави дека Иран сака контрола врз влезот на бродовите во Персискиот Залив и „видливост“ на излезниот сообраќај, со могуќност да интервенира доколку е потребно.
Истовремено, катарскиот премиер, шеикот Мохамед бин Абдулрахман Ал Тани, реализираше телефонски разговори со лидерите на Саудиска Арабија, Оман, ОАЕ, Кувајт и Бахреин со цел намалување на тензиите. Доха порача дека ги поддржува сите напори за постигнување сеопфатен договор за мир во регионот.
Аналитичарите од ING, Ева Мантеј и Ворен Патерсон, предупредуваат дека денешниот падот на цените е „претеран“, бидејќи неизвесноста на теренот останува висока, а ситуацијата брзо се менува.
Безбедносната состојба на море и понатаму е ризична. Британската агенција за поморска трговија пријави нов инцидент во близина на Оман каде товарен брод бил погоден од непозната ракета, додека јеменското движење Ансар Алах ги блокираше саудиските пристаништа во Црвеното Море.
Според најновите пресметки на ОПЕК, барел од нафтената кошничка на членките поевтинил за 8,87 долари и се тргуваше по цена од 79,50 долари.