Американски лекар кој се заразил со смртоносниот вирус ебола во Конго е итно префрлен на лекување во Германија. Неговото пристигнување на аеродромот во Берлин помина под екстремни безбедносни протоколи и силна полициска придружба, со цел да се спречи какво било ширење на опасната зараза.
Транспортот до болничкиот комплекс во Берлин е изведен во текот на ноќта со специјализирани возила.
„Маж излегува од авион среде ноќ, облечен во бело заштитно одело, со респиратор и заштитен визир. Неколку луѓе, исто така во специјални заштитни одела, му помагаат да излезе од авионот и да влезе во амбулантно возило. Човекот е американскиот доктор Питер Стафорд. Тој е заразен со ебола. Неговиот живот треба да се спаси во Берлин.“
Заедно со лекарот, во германската престолнина пристигнале и лицата кои биле во негова непосредна близина за време на престојот во Африка.
„Стафорд се заразил со смртоносниот вирус во Конго. Тој и шест лица кои биле во контакт со него – веројатно вклучувајќи го и неговото семејство – биле префрлени на аеродромот Берлин Бранденбург. Оттаму, тие биле однесени со специјално транспортно возило и во голем конвој возила, вклучувајќи полициска придружба, до болницата Шарите во Берлин.“
Пациентот е сместен во еден од најмодерните и најбезбедните центри за изолација во светот, кој располага со комплетно независна инфраструктура.
„Болницата има специјално одделение за изолација во рамките на клиниката Вирхов. Ова одделение има високо специјализирана инфраструктура за нега на пациенти со високо заразни и опасни по живот заразни болести. Тоа е самостојна и заштитена единица што овозможува изолација, дијагноза и лекување на до 20 лица истовремено. Специјалното одделение има свои пристапни патишта и воздушни комори, системи за вентилација и филтрација, како и затворен систем за третман на отпадни води.“
Здравствените власти веднаш ги смирија граѓаните на Берлин, нагласувајќи дека не постои никаква опасност за пошироката јавност, додека состојбата во Конго станува сè поалармантна.
„Министерството за здравство претходно соопшти дека нема ризик за јавноста или другите пациенти во болницата Шарите. Пациентот ќе биде примен и лекуван во целосна изолација во специјално одделение. Министерството за здравство на Конго досега пријави 513 сомнителни случаи и 131 претпоставена смрт.“
На крајот, медицинските извештаи потсетуваат на начинот на кој се шири овој опасен вирус, како и на црната статистика од претходните големи епидемии.
„Вирусот ебола се пренесува преку физички контакт и контакт со телесни течности. Во текот на 2014 и 2015 година, епидемијата на заирска варијанта во Западна Африка одзеде повеќе од 11.000 животи.“