Полициски службеници од ПС Кисела Вода го лишиле од слобода Г.С. (43) од Скопје, по пријава дека во текот на емисија во живо на порталот „Инфомакс“ влегол во редакцијата и предизвикал инцидент, соопшти МВР.
Настанот се случил синоќа околу 23:45 часот, кога во СВР Скопје било пријавено дека непознато машко лице влегло во просториите на редакцијата на ул. „Востаничка“, оштетило две врати и го попречувало емитувањето на програмата. Во студиото во тој момент биле водителот А.М., гостин во емисијата – поранешниот градоначалник С.Ј., водителот М.Н. и камерман.
Полицијата веднаш реагирала и го привела напаѓачот, а подоцна било утврдено дека станува збор за лице со здравствени проблеми, кое претходно било спроведувано на лекување во Психијатриската болница „Бардовци“.
Од МВР информираат дека по целосно расчистување и документирање на случајот, против Г.С. ќе биде поднесена кривична пријава по брза постапка. Министерството нагласува дека и во иднина ќе постапува брзо и неселективно во сите случаи на напади врз новинари или нарушување на јавниот ред и мир.