Полицијата во Јужна Африка потврди дека телото на деветтата жена е пронајдено за само два месеци, што предизвика огромна загриженост поради серијата нерешени смртни случаи источно од Јоханесбург.
Најновата жртва, чиј идентитет сè уште не е објавен, е пронајдена полугола и завиткана во чаршаф покрај патот во населбата Дон Парк, објави Би-Би-Си. Локалните медиуми пренесуваат дека се работи за жена на околу 30 години, со модринки и убодни рани по телото. Иако досега се пронајдени телата на девет жени во областа Екурхулени, полицијата сè уште утврдува дали сите случаи се меѓусебно поврзани или дали зад нив стои сериски убиец.
Претседателот на Јужна Африка, Сирил Рамафоса, вети дека одговорните ќе бидат изведени пред лицето на правдата, нагласувајќи дека настаните предизвикале страв и неизвесност.
„Секој камен ќе остане непревртен“, порача Рамафоса во врска со расветлувањето на убиствата.
За да се забрза истрагата, полицијата формираше мултидисциплинарен тим и понуди парична награда од 24.500 долари, односно околу 21.000 евра, за информации што ќе помогнат во случајот. Според податоците на ОН за жени, Јужна Африка се соочува со исклучително високи стапки на родово базирано насилство, при што стапката на фемицид е пет пати повисока од глобалниот просек.