Водата во Гостивар засега останува наменета исклучиво за техничка употреба бидејќи во водоводната мрежа е детектирана резидуална бактерија, која се појавила по процесот на чистење и хиперхлорирање на системот.
Ова денеска го соопшти премиерот Христијан Мицкоски за време на посетата на Делчево, појаснувајќи дека фекалните колиформни бактерии повеќе ги нема, но потребно е време да се надмине новиот проблем за водата да биде повторно безбедна за пиење и подготовка на храна.
„И уште некое време таа вода така ќе остане. Сега веќе во инсталацијата ги нема оние фекални колиморфни бактерии, но се појави една нова резидуална бактерија која е присутна во инсталациите поради тоа што долго време не биле користени, а сега со прочистување и со хиперхлорирањето се појавува. Очекувам и овој предизвик да биде надминат, по што водата ќе може да се користи за пиење и готвење“, изјави Мицкоски.
Покрај состојбата со водоснабдувањето, премиерот упати јавен повик до Обвинителството да започне постапка за проверка на околу 400 пријави за неквалитетна вода во Гостивар регистрирани во 2021 година, за време на мандатот на поранешниот министер за здравство Венко Филипче.
Тој побара уште денеска да се извршат проверки во Институтот за јавно здравје и Агенцијата за храна и ветеринарство за да се утврди дали надлежните тогаш постапувале соодветно.
„Го повикувам Обвинителството да ги провери овие наводи и да отпочне постапка зошто, кога имале можност, не преземале ништо за да го заштитат здравјето на граѓаните. Очекувам уште денеска да влезат во Институтот за јавно здравје и во Агенцијата за храна и ветеринарство и да ги испитаат сите овие информации“, рече премиерот.
На изјавата на Мицкоски реагираа од СДСМ, од каде што оценија дека премиерот врши притисок врз Обвинителството и упатија критики дека со ваквите настапи се злоупотребуваат случаи од минатото за изнесување неосновани обвинувања.