Деветнаесетгодишен норвешки државјанин е осуден на 20 години затвор во Велика Британија, откако признал дека се согласил да изврши нарачано убиство за сума од 25.000 евра во корист на меѓународна криминална група.
Јоханес Конгснес Натланд (19), кој бил талентиран фудбалер, во март минатата година отпатувал од Ставангер за Британија со цел да ликвидира сè уште неидентификувано лице.
Само два дена по пристигнувањето, вооружени полициски единици го уапсиле во хотелска соба во Хадерсфилд, каде биле пронајдени полуавтоматски пиштол, револвер, 12 куршуми, заштитни ракавици и 2.000 фунти во готово. Во неговиот телефон биле откриени и фотографии со оружјето и парите расфрлани на креветот.
Иако Натланд пред судот се бранел дека планирал самиот да се застрела во ногата за да се извлече од задачата, поротата го прогласи за виновен за заговор за убиство.
Истрагата откри дека тој бил регрутиран преку шведската банда „Фокстрот“, поврзана со иранскиот режим, а добивал директни наредби од непознато лице под псевдонимот „Агент 47“.
Неговиот адвокат Пол Хајнс во одбраната ја посочи младоста и зависноста од дрога како олеснителни околности, опишувајќи го како успешен спортист кој тргнал по погрешен пат.
За време на сведочењето, самиот Натланд пред поротата истакна:
Не бев меѓународен убиец. Добив впечаток дека луѓето очекуваа од мене да ја играм таа улога. Знаев дека не сум јас.-
Сепак, судијката Чима-Груб за време на изрекувањето на пресудата во судот во Вулич посочи дека неговите пораки покажале дури и возбуда за планираното дело.
Се согласивте да бидете сторител и упорно го правевте тоа, и покрај бројните можности да се повлечете – рече судијката.
Таа потенцираше дека брзата реакција на полицијата спречила трагичен исход.
Иако никој не бил убиен или физички повреден, сигурна сум дека, доколку полицијата не интервенирала и не го спречила планот, ќе го направевте она што сте се согласиле да го направите – заклучи судијката.