Кандидатот за градоначалник на Општина Чаир, Бујар Османи, во своето обраќање испрати силна порака до, како што ја нарече, „урбаната мафија“ која со години ја заробувала општината, збогатувајќи се на грбот на граѓаните. Тој истакна дека по 19 октомври, ниту една нова дивоградба нема да биде дозволена во Чаир.
„Сакам денес да испратам порака до урбаната мафија, која го има заробено Чаир за корист и го разграбува, по 20 октомври нема да има ниту педа во нашата драга општина каде може да се изгради дивоградба!“, порача Османи.
Тој нагласи дека дивоградбите се симбол на неправда и дека мора да се стави крај на коруптивните практики што ја уништуваат општината.
„Не можеме да дозволиме некои олигарси да се збогатуваат на ваш грб, земајќи ви ја водата, тротоарите, патиштата, здивот, вашиот воздух“, изјави Османи, додавајќи дека Чаир повеќе нема да биде најкорумпираната општина во Скопје.
Во врска со стравот на граѓаните за уривање на нивните домови, Османи беше прецизен:
„Нема да ги рушиме ниту објектите без дозвола што веќе се изградени. Луѓето ги потрошија своите животни заштеди за да купат станови. Денес живеат со анксиозност и страв, страв дека утре можат да ги загубат домовите што со години ги создавале. Но јас ветувам: нивните домови нема да бидат допрени.“
Тој потенцираше дека целта на неговата програма е токму спротивното, а тоа е зголемување на вредноста на имотите на граѓаните. Османи истакна дека неговиот пристап е заснован на решенија, не на казни, и дека ќе внесе дисциплина, нова етика и отчетност во работењето на општината.
„Не влегувам во општината Чаир да ја водам, туку да ве инспирирам вас да почне нова ера заедно со мене. Да работиме со други приоритети, со дисциплина друга, со посветеност друга“, додаде тој.
Османи се осврна и на проблемот со чистотата и јавната хигиена, нагласувајќи дека Чаир мора да ја врати сликата на достоинствена, чиста и здрава средина.
„Ако сме познати по чистотата на нашите домови, тогаш зошто нашиот Чаир да биде најнеуредна општина? И Чаир е нашиот двор, единствениот дом каде што растат нашите деца“, рече Османи.
Тој подвлече дека чистотата е прашање не само на естетика, туку и на здравје, и дека токму затоа ова ќе биде еден од неговите први приоритети.