Кандидатот на ВМРО-ДПМНЕ за градоначалник на Скопје, Орце Ѓорѓиевски, со инспиративна порака до скопјани ја претстави својата визија за иднината на главниот град. Ѓорѓиевски порача дека Скопје заслужува повеќе и дека промените се можни – со работа, посветеност и визија.
„Ова не е глас само за мене. Ова е глас за надежта, работата, решителноста. За иднината во која нашите деца ќе растат онака како што ние немавме шанса,“ рече Ѓорѓиевски.
Тој нагласи дека не настапува со празни зборови, туку со конкретни резултати и реализирани проекти од Општина Кисела Вода, каде што како градоначалник се истакна со реконструкција на улици, уредување паркови и градење игралишта.
„Тоа што го направивме во Кисела Вода е доказ дека можеме. Тоа ќе го направиме и во Скопје – во секоја населба, за секој граѓанин,“ вети тој.
Ѓорѓиевски најави конкретни мерки уште во првите денови од мандатот, доколку ја добие довербата на граѓаните. Како прв симболичен, но суштински чекор, тој ја најави акцијата „Генералка на Скопје“ – масовна мобилизација за чистење на градот во првите 72 часа од мандатот.
„Ќе ги мобилизираме сите – јавни претпријатија, компании, невладини, граѓани – секој што го сака Скопје. Да го исчистиме секое ќоше и да покажеме дека грижата за заедничкиот дом почнува од прагот.“
Во план е и четиригодишна програма „Град без депонии“, која предвидува воведување дронови и дигитален надзор за следење диви депонии, како и изградба на фабрика за рециклажа.
Ѓорѓиевски вети и „Еко бригади“ кои 24/7 ќе се грижат за јавната хигиена, како и секојдневно миење на главните булевари со вода под притисок.
„Скопје заслужува лидери и граѓани што нема да се откажат. Ќе чекориме напред, дури и кога е најтешко. Ние заедно ќе победиме!“ – порача Ѓорѓиевски, испраќајќи силна порака за нов почеток и конкретни промени во Скопје.