Градоначалникот Тони Коњановски и секретарот на Општина Битола, Борче Димитровски, ги продолжија традиционалните месечни средби со новинарите на кои информираа за тековните проекти што ги реализира локалната самоуправа.
Во фокусот на денешниот состанок беа инфраструктурните инвестиции, изградбата на спортски игралишта и сали, како и претстојниот јавен повик за набавка на електрични велосипеди.
За оваа намена, општината во рамки на програмата за животна средина издвои буџет од 4,8 милиони денари.
„Во рамки на програмата за животна средина обезбедивме 4,8 милиони денари за набавка на електрични велосипеди. На овој начин ја потврдуваме тенденцијата Битола да стане вистински вело-град за што изградивме велосипедски патеки. Новите електрични велосипеди ќе се користат врз принципот на изнајмување, преку апликација со симболични цени на изградени велосипедски патеки. На неколку пунктови граѓаните ќе имаат возможност да изнајмуваат велосипеди од сите страни на градот, помалку да користат возила, а повеќе велосипеди и, и тие да придонесуваат за заштитата на животната средина, истакна градоначалникот Коњановски.“
Коњановски додаде дека во соработка со Владата се изведува и голем проект за обнова на сите спортски терени во училишните дворови.
„На десет локации се градат 26 спортски игралишта со комплетна опрема, тартан подлога и заштита, оградување и осветлување. Спортските терени кои биле градени во минатиот век, сега ќе бидат целосно со нова спортска опрема и тоа ќе овозможи враќање на спортот како активност, но и одвојување на децата од мобилните телефони, во замена на спортски дух и физичка активност. Овој проект во најголем дел е завршен, а дел од проектите се реализираат затоа што имаме обезбедени средства. Важно е да се истакне дека кај дел од училиштата ќе има и спортски сали кои ќе се наоѓаат во урбаниот и руралниот дел на општината, посочи Коњановски.“
Локалната самоуправа најави дека наскоро ќе ја пушти во употреба и новата детска градинка кај ОУ „Св. Климент Охридски“.
Објектот е комплетно опремен, обезбеден е потребниот персонал и во моментов се чека уште формалната согласност од надлежните органи за прием на децата.