Обвинувањата од страна на опозицијата за состојбата со водата за пиење во Гостивар се неосновани, изјави Марија Андоновска, член на ИК на ВМРО-ДПМНЕ и директорка на Институтот за јавно здравје (ИЈЗ), за време на гостувањето во централниот Дневник на ТВ Сител.
Таа посочи дека нападите доаѓаат од оние кои зад себе оставиле нефункционални институции и распаднат систем.
„Во однос на контролата и надлежноста на институтот, самите обвинувањата се неосновани, мотивом за сето тоа мислам дека знам од каде доаѓа, од причина што оние кои оставија една распадната држава, еден распаднат систем, распаднати институции, нема пора во општеството коешто ја оставија функционална“, вели Андоновска.
Директорката на ИЈЗ направи споредба со состојбата во која го заварила Институтот на самиот почеток од нејзиниот мандат, за време на епидемијата од пертусис.
„Еден реагенс немаше. Замислете еден реагенс за да можете да дијагностицирате дали некој има пертусис или не, за да му дадете соодветна терапија. Истите тие коишто ги создаваат и креираат проблемите, што прават хистерија во моментов, оставија во Институтот десет тони хемиски опасен отпад во кругот на Клинички центар, непрописно складиран, со паднат покрив каде што самиот отпад веќе почнал да испарува и, веројатно, можел да создаде одредени здравствени проблеми како што кажуваат стручните лица. Значи, можело да настане и хаварија и експлозија од невидени размери“, истакна Андоновска.
Според неа, сегашните критики се обид за дефокусирање на јавноста од вистинските причинители на проблемите.
Таа апелираше да се прекинат политичките напади бидејќи тие не нудат конкретни решенија за граѓаните.
„Додека од друга страна Владата ги презема обврските што треба да ги има општината за да формира кризен штаб, се вклучуваат многу институции за да можат, што е најважно, да се стабилизира здравствената состојба и граѓаните да добијат вода за пиење. Јас верувам дека институциите ќе останат фокусирани, нема да бидат дефокусирани од овие неаргументирани напади и ќе ја стабилизираат состојбата, а во иднина и ќе го стабилизираат целокупниот систем распаднат систем којшто ни го оставија“, рече Андоновска.