Оставањето на навидум безопасни ситници во возилото во текот на летото може да предизвика сериозни експлозии и пожари. Сите предмети кои содржат ознака „лесно запаливо“ или имаат батерии претставуваат огромен ризик доколку се изложени на директно сонце.
Во топлите денови, внатрешноста на паркиран автомобил на надворешна температура од 35 степени може да надмине 60 степени за помалку од еден час, додека на контролната табла температурата достигнува и до 80 степени.
Поради ваквите екстремни услови, неодамна во Нов Зеланд се запали автомобил од прегреан таблет, додека во Алабама експлодираше електронска цигара, а во регионот е забележан и случај на изгорено возило поради експлозија на обична запалка.
Стручните лица од Секторот за вонредни ситуации при МВР на Србија предупредуваат дека мобилните телефони и таблетите се вистинска „темпирана бомба“. Кога литиум-јонската батерија ќе достигне 60 степени, таа влегува во фаза на термичко бегство, што води до експлозија или пожар.
Истиот ризик од експлозија постои и кај полначите, адаптерите и електронските цигари доколку се заборават на директно сонце.
Обичните пластични запалки, пак, содржат бутан кој се шири при загревање, по што куќиштето пука и се појавува пламен. Слично е и со кибритите, каде црвениот фосфор на главата може сам да се запали низ шофершајбната.
Дезодорансите и спрејовите под притисок се особено критични, бидејќи со секои 10 степени над препорачаната температура притисокот во нив се зголемува за 0,3 бари. На 60 степени во возилото, притисокот надминува 9 бари, што е доволно силно да го пробие и покривот на автомобилот.
Течностите кои содржат алкохол испаруваат веќе на 30 степени, со што затворените шишиња можат да протечат и да ослободат лесно запаливи пареи во кабината.
Дополнително, обичните пластични шишиња со вода или леќите од очила можат да делуваат како лупа и да ги фокусираат сончевите зраци, предизвикувајќи пожар на седиштата, а притоа ослободуваат и штетни материи во воздухот.
Експертите советуваат уредите со батерии секогаш да се носат со себе или да се остават во сенка со подотворен прозорец, запалките и спрејовите да се чуваат во термо кеси, а пластичните шишиња да се ставаат исклучиво под седиштата.