Министерот за дигитална трансформација, Стефан Андоновски, најави дека на 28 октомври во Македонската филхармонија официјално ќе биде промовирана мобилната апликација м.Услуги, преку која граѓаните ќе можат да пристапуваат до електронски документи и услуги директно од своите мобилни телефони.
Во гостувањето во Дневникот на МРТ1, Андоновски посочи дека апликацијата е во завршна фаза на тестирање, а на промоцијата ќе присуствува и премиерот Христијан Мицкоски, кој ќе ги претстави пошироките насоки за дигитализација на државата.
„Промоцијата официјално можам да ја најавам на 28 октомври во Македонската филхармонија. Ќе ја промовираме мобилната апликација м.Услуги, јас ќе ги презентирам изгледот и функционалностите, а претседателот на Владата ќе говори пошироко за тоа каде се движиме во поглед на дигитализацијата“, изјави Андоновски за МРТ.
Апликацијата ќе биде достапна бесплатно преку продавниците Google Play и App Store. За да ја користат, граѓаните ќе треба да се најават преку својот профил на Националниот портал за електронски услуги, uslugi.gov.mk.
На почетокот, м.Услуги ќе овозможи пристап до електронски верзии на личната карта и возачката дозвола, како и до три услуги за граѓаните. Министерот нагласи дека користењето ќе биде доброволно и дека безбедноста на личните податоци е еден од приоритетите.
„Ова ќе биде наш прв чекор кон дигиталниот паричник. Апликацијата е бесплатна за преземање и не е задолжителна, но ќе нуди многу нови погодности. Ќе го свртиме фокусот кон тоа државата да биде достапна на мобилниот телефон, односно на дланка“, порача Андоновски во гостувањето на МРТ1.
Во следните фази се планира проширување на функционалностите. Според министерот, веќе се разговара со Министерството за здравство за вклучување податоци од м.Здравје, како и со Министерството за социјална политика, демографија и млади за можноста за интегрирање на европската младинска картичка.
Андоновски појасни дека прифаќањето на електронските документи од страна на институциите ќе се воведува постепено, со потребни законски и административни приспособувања.
„Кај нас нема задолжителна употреба, но во исто време ќе правиме напори институциите да започнат да ги прифаќаат електронските документи. Тоа ќе биде процес, бидејќи ќе треба да се менуваат и подзаконски акти. Чекор по чекор, како што ќе ги градиме капацитетите, така ќе се проширува и нивното прифаќање“, рече министерот.
Тој додаде дека досегашните реакции за проектот се позитивни и дека Министерството ќе продолжи да работи на дигитални решенија со кои административните услуги ќе бидат подостапни за граѓаните.