Центарот за стратегиски истражувања „Ксенте Богоев“ при Македонската академија на науките и уметностите (МАНУ), во партнерство со Програмата за развој на Обединетите нации (УНДП) и со поддршка на Австриската агенција за развој (АДА), денеска во Охрид ја отвора „Охридската летна школа на природно право“.
Свеченото отворање ќе се одржи во „Куќата на Уранија“ со почеток во 10 часот.
На настанот се најавени обраќања на заменик-министерот за правда Ален Деребан, академик Владо Камбовски од МАНУ, заменичката на постојаниот претставник на УНДП во земјава Ана Чернишова, како и Давид Мукенхуберт, раководител на Регионалната канцеларија за техничка соработка на Австриската амбасада.
Организаторите истакнуваат дека школата има за цел унапредување на знаењата и професионалните капацитети во областа на бесплатната правна помош и пристапот до правда, со посебен фокус на заштита на ранливите категории граѓани.
Иницијативата се спроведува во рамки на регионалниот проект „EQUALS“, кој има за цел реформирање и унапредување на системот за бесплатна правна помош, во согласност со стандардите на Европската Унија и меѓународното право за човекови права.