Врховниот суд го објави образложението на одлуката со која ги уважи барањата на осудените за вонредно преиспитување на правосилната пресуда во предметот за сообраќајната незгода кај селото Ласкарци. Со оваа одлука се укинува пресудата на Апелациониот суд од 17.04.2025 година, со која беа зголемени казните на дел од обвинетите, и предметот е вратен на повторно постапување.
Според образложението на Врховниот суд, Апелација не дала доволно конкретни одговори на суштинските жалбени наводи, ниту детално образложила како дејствијата на секој од осудените се поврзани со несреќата.
„Со оглед на наведеното заклучокот на овој суд е дека Апелациониот суд Скопје не дал одговор на сите жалбени наводи истакнати од сега осудените во поднесените жалби кои пак како правен лек овозможуваат сеопфатна анализа и контрола на спроведената постапка пред првостепениот суд. Во првостепената пресуда според овој суд преовладува дескритивниот пристап со извадоци од изведените докази, без притоа да се наведат причините за таквата констатација на судот. Постапувајќи по жалбите, второстепениот суд не дал одговор на таквите недостатоци, туку само дава воопштени одговори и констатации на жалбените наводи и прашања кои се од суштествено значење за утврдување на кривично правната одговроност на осудените“, се вели во пресудата на Врховен.
При повторното постапување, второстепениот суд е должен да постапи по напатствијата на Врховниот суд и да направи целосна анализа на сите жалбени наводи.
„Да одлучува во границите на испитување на првостепената пресуда во оној дел во кој се побива во поднесените жалби, односно да направи целосна анализа на сите жалбени наводи, како и да внимава по службена должност во случаите кои се предвидени со закон, на кој начин ќе донесе правилна и законита одлука“, стои во пресудата.
Советот за казниви дела одлучувал по предметот КВП2-86/25 на седницата одржана на 9 септември.
„Со донесената пресуда во предметот КВП2-86/25, барањата за вонредно преиспитување на правосилна пресуда, поднесени од осудените преку нивните бранители се уважуваат, пресудата на Апелациониот суд Скопје КЖ-979/24 од 17.04.2025 година се укинува и предметот се враќа на повторно постапување и одлучување“, стои во соопштението.
Станува збор за случајот од мај 2025 година кога Апелација им ги зголеми казните на сопственикот на „Дурмо турс“, Дурмиш Белули, и на Ремзи Мифтари на по 10 години затвор, додека за Игор Ѓорѓиевски и Горан Дуковски на по седум години. Казните за Јане Боваровски и возачот Маноил Трифуновски останаа пет, односно 14 години. Трагедијата кај Ласкарци се случи на 13 февруари 2019 година кога автобус излета од автопатот Скопје-Тетово, при што животот го загубија 16 лица, а над 30 беа повредени.