Домаќинствата во Македонија би можеле да добијат значително повеќе часови со евтина електрична енергија во текот на денот. Ова го најави претседателот на Регулаторната комисија за енергетика (РКЕ), Ацо Ристов, откривајќи дека во тек е детална анализа на сегашниот систем на блок тарифи.
Главната цел на овој процес е граѓаните да добијат пониски сметки преку подобро искористување на струјата произведена од обновливи извори на енергија.
Според Ристов, актуелниот систем на блок тарифи бил воведен како итна мерка за време на енергетската криза, но оттогаш состојбите на пазарот значително се промениле. Сега се размислува за нов модел кој би овозможил поевтината струја од фотоволтаичните централи да стигне директно до домаќинствата.
Регулаторот објаснува дека во одредени периоди од денот има големо производство на електрична енергија од сончевите електрани, а идејата е таа енергија да се насочи кон граѓаните наместо да остане неискористена.
Како една од клучните опции што моментно се разгледуваат во РКЕ е проширување на дневната евтина тарифа од сегашните два на вкупно пет часа дневно, мерка која значително би ги олеснила месечните трошоци на семејствата.
Во однос на ноќната евтина тарифа, Ристов посочи дека таа нема да се укине, но можно е да претрпи одредени корекции во временскиот период на важење. Сите конечни одлуки ќе бидат донесени по завршувањето на анализите што ги подготвува Комисијата.