ЈУ Градска библиотека „Браќа Миладиновци“ – Скопје денеска ќе одбележи 165 години од објавувањето на „Зборникот на браќата Миладиновци“ со свечен настан што ќе се одржи во Спомен-собата „Т’га за југ“.
Од библиотеката информираат дека одбележувањето е посветено на значењето на делото на Димитар и Константин Миладинов во развојот на македонскиот јазик, книжевност и културен идентитет.
Настанот ќе го отвори директорката на ЈУ Градска библиотека „Браќа Миладиновци“ – Скопје, Анета Механджијска, по што ќе следува стручен осврт за „Зборникот“ и за творештвото на браќата Миладиновци од Братислав Ташковски.
Во рамки на програмата е предвидена и актерска изведба на избрани песни и текстови од „Зборникот на браќата Миладиновци“, како и изложба на сите изданија на делото и други публикации поврзани со Миладиновци од библиотечниот фонд.
„Зборникот на браќата Миладиновци“, објавен во 1861 година, се смета за едно од најзначајните дела во македонската културна и книжевна историја, со трајно значење за зачувување на народното творештво и јазичното наследство.