Филозофскиот факултет останува клучна институција во развојот на македонското општество – темел на хуманистичката мисла, извор на научна извонредност и генератор на кадри што ја обликуваат државата повеќе од еден век. Ова беше главната порака на одбележувањето на јубилејот 105 години од основањето на Филозофскиот факултет во Скопје.
Министерката за образование и наука, Весна Јаневска во своето обраќање ја истакна историската улога на факултетот во развојот на македонското општество и во создавањето генерации научници, истражувачи и општествени визионери.
-Повеќе од еден век придонес кон градење на општеството, кон градењето на генерации научници, истражувачи и општествени визионери кои некогаш и сега ја обликуваат државата, рече Јаневска, изразувајќи благодарност до професорите и вработените за нивната посветеност и научен придонес.
Таа нагласи дека улогата на високото образование е клучна за развојот на современото општество, посочувајќи дека универзитетите не се само институции за стекнување диплома, туку простори каде се создаваат критички и општествено одговорни граѓани.