Турските телевизиски серии денес се гледаат од околу една милијарда луѓе во 170 држави, а нивниот извоз на странските пазари веќе носи приходи од над една милијарда долари годишно, беше истакнато на настан во Истанбул посветен на глобалното влијание на турската телевизиска продукција.
Шефот на турската Дирекција за комуникации, Бурханетин Дуран, изјави дека Турција денес е меѓу трите најголеми извозници на телевизиски серии во светот.
Според него, во раните 2000-ти години извозот на турски серии на странските пазари изнесувал околу 10 милиони долари, додека денес ја надминува границата од една милијарда долари.
Дуран оцени дека меѓународниот успех на турските серии не треба да се гледа како проект за културна хегемонија, туку како доказ за способноста на Турција да создава сопствени приказни кои успеваат да допрат до публика во различни делови од светот.
Турскиот министер за култура и туризам Мехмет Нури Ерсој, пак, посочи дека значењето на телевизиските серии одамна ја надминало само нивната економска вредност.
Според него, популарноста на турските продукции го зголемува интересот за Турција, турскиот јазик, културата, гастрономијата и туристичките дестинации, поради што сериите се претвораат и во важен инструмент за промоција на земјата во странство.