Бројот на заболени од западнонилска треска годинава е драстично зголемен. Во истиот период лани биле регистрирани само два случаи, додека годинава се евидентирани 53 пациенти.
Министерот за здравство Сашо Клековски вели дека нема едноставно и единствено објаснување за ваквиот пораст, бидејќи однесувањето на вирусот е непредвидливо и не постои научно утврден образец според кој однапред може да се процени бројот на заболени.
Во сите претходни години заедно во земјава биле регистрирани 54 случаи и пет смртни исходи, додека годинашната бројка веќе се приближува до тој вкупен биланс. Како една од можните причини Клековски ја посочува миграцијата на птиците, кои се главен природен резервоар на вирусот, но нагласува дека влијаат и други фактори.
Како пример ја наведе северна Италија, особено регионите Венето и Ломбардија, каде секоја година се спроведуваат слични мерки за контрола на комарците, но бројот на заболени значително варира. Според него, тоа покажува дека ширењето на вирусот не зависи само од обемот на дезинсекцијата.
Од 53 евидентирани пациенти во Македонија, кај 50 инфекцијата е потврдена, додека за тројца се очекуваат дополнителни резултати. Регистрирани се пет смртни случаи, 21 пациент е хоспитализиран, а шестмина се на интензивно лекување. Повеќето заболени развиле невроинвазивна форма на болеста.