Министерството за образование и наука информира дека корисниците на студентски стипендии од изминатите академски години, кои ги исполнуваат договорните услови за продолжување на правото на стипендија, ќе можат да аплицираат од 1 до 30 октомври 2026 година.
За продолжување на стипендијата, студентите треба електронски да ги достават потребните документи: потврда за запишан нареден семестар или година на студирање, уверение со положени испити издадено од факултетот, како и уверение за предвидени и положени испити (УППИ).
Во УППИ образецот, кој го пополнува и заверува факултетот, треба да биде наведен успехот од претходните години. Документот служи како доказ дека студентот ги положил потребните 80 или 90 проценти од предвидените испити, зависно од типот на стипендијата, односно дека го задржал потребниот просечен успех согласно договорот.
Потребно е да се достави и индексот, од првиот запишан семестар до последниот заверен семестар.
Од МОН посочуваат дека целокупната документација треба да се прикачи електронски преку e-услугите на МОН.
За дополнителни информации и прашања, студентите можат да се обратат на електронската пошта studentskii.stipendii@mon.gov.mk.