Кочанскиот обвинител Борче Јанев денеска го одржа воведниот говор на судењето за трагедијата во дискотеката „Пулс“, каде што загинаа 63 млади лица, а над 200 беа повредени.
Јанев категорично истакна дека катастрофата не е последица на еден човек или само на активирање пиротехника, туку на низа системски пропусти кои дозволиле објектот да работи без соодветни излези и контроли.
„’Пулс’ од секогаш била смртоносна стапица, буре барут. Никој не ја согледал опасноста која демнела со години“, нагласи обвинителот.
Јанев посочи дека одговорноста се протега низ долг временски период, од 2012 година до денот на трагедијата, и опфаќа голем број обвинети.
Тој најави дека јавноста ќе биде шокирана од дејствијата на сопственикот на дискотеката, кој ги занемарил сите опасности и го вовлекол дури и сопственото дете во смртоносната стапица.
„Снимките што нè потресоа се само одложено зло. Изгоре не само објектот, туку и довербата дека оној кој требало да заштити, навистина го направил тоа,“ заклучи Јанев.