Министерството за култура ги објави годишните конкурси за финансирање проекти од национален интерес во културата за 2027 година.
Пријавувањето ќе се врши исклучиво електронски преку Националниот портал за е-услуги, а рокот за аплицирање е од денеска во 12 часот до 31 октомври во 15:30 часот.
Останува минималниот праг од 40 од вкупно 100 бода за добивање финансиска поддршка. Правните лица ќе можат да аплицираат со најмногу четири проекти, а физичките со најмногу два.
Бодувањето ќе биде унифицирано: до 70 бода за квалитет на содржината, 15 за човечки ресурси и 15 за финансиска оправданост.
Министерот за култура Седат Сулејмани посочи дека предност ќе имаат сериозни, одржливи и квалитетно осмислени проекти со потенцијал за меѓународна афирмација, развој на нова публика и соработка со институции.
Посебно внимание, како што најави, ќе се посвети и на проекти што ќе се реализираат во пограничните подрачја, но и на помали иницијативи со висок уметнички квалитет и значење за локалните заедници.