Обилните врнежи што ја зафатија земјава во изминатото деноноќие беа најизразени во скопскиот регион, каде во населбата Црешево се измерени 74 литри дожд на квадратен метар. Високи количини се регистрирани и во Лисиче со 63 литри, како и во Гази Баба, каде наврнале 44 литри на квадратен метар.
Според податоците на Управата за хидрометеоролошки работи (УХМР), до 8 часот утрово 32 литри на квадратен метар се измерени во Куманово, 29 во Крива Паланка, 22 во Берово, по 18 во Струмица и на Зајчев Рид во Скопје, 16 на Попова Шапка, 13 во Карпош, по 12 во Претор, 11 во Ѓорче Петров и Демир Капија, 10 во Гевгелија, девет во Кавадарци, осум во Велес, седум во Петровец, пет во Тетово, а по три литри во Виница, Маврови Анови и Ѓуриште.
Од УХМР појаснуваат дека станува збор за мерења од нивните дождомерни станици и дека, поради локалниот карактер на врнежите, на одредени места можеби наврнале значително поголеми количества дожд од официјално измерените.
И денеска времето ќе остане нестабилно. Во претпладневните часови се очекува променлива облачност, а по котлините ќе има услови за појава на утринска магла. Попладне се прогнозираат локални врнежи од дожд и грмежи, а на поединечни места се можни поинтензивни невремиња со пороен дожд над 15 литри на квадратен метар, силен ветер со брзина поголема од 60 километри на час и појава на град. Дневната температура ќе се движи од 27 до 35 степени.
Во Скопје ќе преовладува променливо облачно и нестабилно време со повремен дожд, грмежи и засилен ветер. Во делови од котлината се можни краткотрајни невремиња проследени со обилни врнежи и град, а максималната температура ќе достигне до 32 степени.