Германскиот град Зинциг од утринава е во центарот на заложничка криза во филијала на „Фолксбанк“. Специјални полициски единици го опколија објектот, а над градот патролираат хеликоптери во обид да се стави ситуацијата под контрола.
Според информациите на германски „Билд“, драмата започнала околу 9 часот утрово, по што целиот центар на градот е блокиран и ограден од полициските сили.
Инцидентот започнал во моментот кога возило за транспорт на пари пристигнало пред банката. Кога еден од вработените излегол од оклопниот камион, бил пресретнат од непознат маж кој му се заканил, по што започнала кризата.
Портпаролот на локалната полиција информираше за првичните претпоставки од теренот.
„Се верува дека во банката има неколку напаѓачи и заложници, а меѓу заложниците наводно е и возачот на оклопно возило за транспорт на пари. Според достапните информации, киднаперот и еден вработен се во трезорот на банката“, изјави портпаролот.
Засега нема официјални потврди за бројот на луѓе во банката ниту дали напаѓачите се вооружени. Полицијата апелираше до граѓаните да останат мирни и да не шират гласини.
„Полицијата ги повика граѓаните да не шират непроверени информации и гласини на социјалните мрежи. Полицијата тврди дека засега нема опасност за жителите надвор од блокираната област“, пренесуваат медиумите.