Општина Карбинци реализираше низа капитални и инфраструктурни проекти во изминатата година, информираше денеска градоначалникот Виктор Паунов за време на презентацијата на отчетот за својата работа.
Во фокусот на локалната самоуправа беа инвестициите во образованието, каде што е изграден нов училиштен објект во Радање и се врши доградба на градинката „Кокичиња“ за дополнителни 100 деца. Паралелно, општината доделува по 5.000 денари за првачињата, средношколците-прваци и бруцошите, како и 10.000 денари за новороденчиња.
На планот на патиштата и уредувањето, пуштена е во употреба пешачката патека Таринци – Карбинци со должина од 1,5 километри, а се градат и нови улици со поддршка од Светска банка. Извршена е реконструкција на училишната спортска сала, а во Долни Балван се реализира капитален проект за изградба на каналот Герен и уредување на коритото на Брегалница.
„Нашата цел е јасна – модерна, развиена и функционална Општина Карбинци. Општина во која младите ќе имаат услови да останат, а семејствата ќе имаат поддршка“, истакна Паунов.
Градоначалникот најави дека општината ќе продолжи со истата динамика на инвестирање во сите населени места, со посебен акцент на подобрување на условите за живот и локалниот развој.