Жителите на северните и источните делови на округот Тулча во Романија утрово добија нова порака преку системот RO-ALERT, со предупредување за можна опасност од паѓање на дронови или нивни фрагменти поради воените дејствија во Украина.
Надлежните институции преку пораката ги повикуваат граѓаните да зачуваат смиреност и во наредните 90 минути да се засолнат на безбедни локации, пренесува агенцијата „Аџерпрес“.
Алармот доаѓа по последниот инцидент регистриран во средата, кога на романската плажа Олимп во населбата Вранчеј, во близина на градот Констанца, беа откриени остатоци од дрон.
По пронаоѓањето на остатоците, присутните граѓани беа веднаш евакуирани од локацијата, а целото подрачје беше блокирано и затворено за јавноста.
Романските власти во изминатиот период зачестено издаваат вакви предупредувања за пограничните региони, пред сè поради интензивните руски напади врз украински цели кои се наоѓаат во непосредна близина на границата со Романија.