Со поддршка на Владата и Министерството за образование, денеска започна реализацијата на проектот за проширување на капацитетите на училиштето „Страшо Пинџур“ во Ѓорче Петров. Премиерот Христијан Мицкоски нагласи дека ова е само дел од низата проекти кои следат во оваа општина.
Мицкоски упати благодарност до општинската администрација, советниците и пратениците од овој дел на градот за нивниот ангажман во обезбедувањето подобри услови за живот.
„Ние како Влада ќе продолжиме да поддржуваме ваков тип на проекти. Има уште неколку вакви проекти во периодот којшто следи во деновите и неделите, и секогаш сум тука да ги поздравам и да ги поддржам“, порача Мицкоски.
Премиерот потенцираше дека е неопходно сите алки во системот – од локално до централно ниво – да работат координирано за да се постигне подобар квалитет во образованието. Настанот беше искористен и за најава на нови инвестициски циклуси кои ќе бидат промовирани во најскоро време.