Македонските граѓани кои патуваат во земјите од Шенген зоната се соочуваат со значајни промени на европските гранични премини. Покрај Европскиот систем за влез и излез (EES), се воведува и ETIAS — електронско одобрение кое ќе мора да се обезбеди пред тргнување на пат.
ETIAS не претставува класична виза, туку електронска авторизација за краткорочни патувања наменета за државјаните на земјите со безвизен режим.
Според предвидениот модел, авторизацијата ќе чини 20 евра. Од плаќање на оваа такса ќе бидат ослободени лицата помлади од 18 и постари од 70 години, но и за нив останува обврската за поднесување апликација и поседување важечко одобрение.
Одобрениот ETIAS ќе биде електронски поврзан со пасошот и ќе важи до три години или до истекувањето на патната исправа. Во тој период се овозможуваат повеќекратни патувања, при што и понатаму важи ограничувањето за престој од најмногу 90 дена во прозорец од 180 дена.
Една од клучните новини е што превозниците ќе имаат обврска уште пред почетокот на патувањето да проверат дали патникот поседува одобрение, што значи дека без него нема да биде овозможено качување во автобус или авион.
Аплицирањето ќе се одвива преку интернет со пополнување лични податоци, информации од пасошот и одговори на безбедносни прашања. По податоците ќе следува автоматска проверка низ европските информациски системи.
Важно е да се прави разлика меѓу двата система: ETIAS е претходна авторизација што се обезбедува пред патувањето, додека EES се однесува на дигиталната биометриска евиденција за влез и излез која се врши директно на самите гранични премини.
Од надлежните потсетуваат дека добиениот ETIAS сам по себе не гарантира автопатски влез во ЕУ, бидејќи конечната одлука и понатаму ја носат граничните служби при контролата.