Патувањето со домашни миленици во земјите на Европската Унија од неодамна подлежи на нови, построги правила кои стапија на сила на 22 април 2026 година. Како што пренесува „Дона модерна“, целта на овие измени е зајакнување на здравствените контроли и спречување на ширење болести меѓу државите членки.
Новите одредби се однесуваат на сопствениците на кучиња, мачки и творови, а во одредени случаи и на некои видови домашни птици. Задолжителни документи за преку граница се микрочип според европски стандарди, важечка вакцинација против беснило и европски пасош издаден од овластен ветеринар.
„Контролите сега се подетални и покоординирани, особено кога станува збор за проверка на документите и идентификација на животните“, се наведува во новите регулативи.
Микрочипот мора да биде регистриран и неговиот број целосно да се совпаѓа со оној во пасошот, во спротивно миленичето може да биде задржано на граница. Вакцинацијата против беснило мора да биде примена најмалку 21 ден пред патувањето.
Дополнително, некои земји како Ирска, Финска и Малта бараат и задолжителен антипаразитски третман за кучињата. Експертите советуваат сопствениците да ги проверат документите неколку дена пред тргнување за да избегнат компликации на граничните премини.