Поголема заштита за корисниците, построги правила за компаниите за лизинг и поголема транспарентност во работењето предвидуваат измените на Законот за финансиски лизинг, кои беа усвоени во Собранието.
Новите законски решенија се дел од реформските активности на Министерството за финансии во рамки на Реформската агенда, а имаат цел усогласување на домашната регулатива со европските стандарди.
Со измените се воведуваат појасни правила за склучување договори за финансиски лизинг, при што давателите ќе мора прецизно да ги наведуваат сите трошоци и надоместоци поврзани со услугата. Дополнително, се овозможува договорите да се склучуваат и во електронска форма, согласно прописите за електронски документи и идентификација.
Од Министерството за финансии посочуваат дека корисниците ќе добијат можност во секое време целосно или делумно да ги отплатат преостанатите обврски без дополнителни трошоци, со што ќе се намалат вкупните трошоци за преостанатиот период од договорот.
„Со цел зголемување на транспарентноста и заштитата на корисниците, со измените се прецизираат задолжителните елементи што треба да ги содржи секој договор за финансиски лизинг, вклучително и сите надоместоци поврзани со лизингот. Дополнително, се овозможува договорите за финансиски лизинг да се склучуваат и во електронска форма, доколку се исполнети условите согласно прописите за електронски документи, електронска идентификација и доверливи услуги, како и прописите за спречување перење пари, заштита на лични податоци и други релевантни прописи“, велат од Министерството за финансии.
Новите правила предвидуваат и дополнителни механизми за заштита на корисниците. Давателите на финансиски лизинг нема да можат да го користат предметот на лизинг како залог без претходна писмена согласност од корисникот, која ќе треба да биде дадена пред нотар во посебен документ.
Со законските измени се зголемува и транспарентноста на компаниите преку обврска за јавно објавување на годишните финансиски извештаи, заедно со извештаите и мислењата на овластените ревизори.
Покрај тоа, се зајакнува надзорот над работењето на давателите на финансиски лизинг, а минималниот износ на основната главнина се зголемува од 6 на 30 милиони денари, со цел поголема финансиска стабилност на компаниите.
Со измените се вклучуваат и препораките на MONEYVAL Комитетот при Советот на Европа во делот на спречување перење пари и финансирање тероризам, преку воведување критериуми за интегритет и соодветност на основачите и членовите на органите на управување на лизинг-компаниите.