Патниците кои користат железнички превоз низ Европската Унија во иднина ќе бидат позаштитени од доцнења и откажувања на линиите, благодарение на новата европска регулатива. Измените предвидуваат воведување казни за компаниите, но и укинување на досегашната пракса на менување на возниот ред двапати годишно.
Хрватскиот европратеник Гордан Босанац ги оцени овие промени како значаен чекор кон подобрување на искуството при патувањето со воз.
„Денешното усвојување на Регулативата за единствен европски железнички транспорт е голема победа за патниците со железница низ цела ЕУ и прв чекор во нивната заштита од доцнења и откажувања, но и голема зелена победа во зајакнувањето на оваа еколошка форма на патување“, рече Гордан Босанац, пратеник од партијата Мозомо и групата Зелени/ЕСА во Европскиот парламент, додавајќи дека е штета што воведувањето на новите правила ќе трае речиси пет години.
Според планот, системот на казни за управителите на инфраструктурата и железничките претпријатија ќе стапи на сила почнувајќи од 2031 година, во случаи кога ќе има доцни откажувања или ненавремено затворање на линиите.
Со новите правила се воведува таканаречениот „ротирачки возен ред“, што ќе им овозможи на патниците подобро и порано да резервираат билети, бидејќи туристичките оператори ќе можат да почнат со продажба многу порано.
Процесот ќе се одвива преку дигитализација и меѓусебно поврзување на операторите, со што подобро ќе се координира распределбата на железничкиот капацитет помеѓу патничкиот и товарниот транспорт. Ова, според проценките, треба да доведе до очекувано вкупно европско зголемување на железничкиот капацитет од четири проценти.
Како следен чекор на кој ќе се работи во Брисел се најавува воведувањето на единствен билет за патување низ сите земји-членки.
„Ова зголемување од четири проценти треба да доведе и до зголемување на бројот на возови и линии, што е добро за патниците на долг рок. Сепак, пред Европскиот парламент и Комисијата стои уште една голема задача, а тоа е воведувањето на единствен европски железнички билет, кој треба да им овозможи на патниците да купат еден билет за патување низ цела ЕУ, наместо да мора да купуваат посебен билет за секој давател на транспортни услуги, во зависност од земјата низ која патуваат, како и воведувањето надомест за доцнења за патниците“, рече Босанац.