Нови морничави сведоштва за пеколот низ кој поминале починатата Ивана и нејзината ќерка Катја беа изнесени денеска во Основниот кривичен суд Скопје. Мајката на Ивана, Љубица Стојановска, откри дека обвинетиот Стојанче Јовановски не престанал со насилството дури ни кога неговата сопруга била хоспитализирана на Хирургија со внатрешни крварења предизвикани од удари.
Според сведочењето, Стојанче ја нападнал Ивана пред лифтовите на Клиниката, обидувајќи се да ѝ ги одземе телефоните, по што ја турнал по скалите пред очите на малата Катја.
„Додека Ивана била во болница, Катја им кажала на медицинските сестри дека претходниот ден јадела само ѓевречиња, бидејќи татко ѝ ја заклучил сама дома за да замине на вежбање“, сведочеше низ солзи мајката на починатата жена.