Во Скопје в четврток ќе се одржи отворен ден посветен на ЕКСПО 2027 Белград, на кој ќе бидат претставени можностите за учество, соработка и вмрежување. Настанот го организира ЕКСПО 2027 Белград во соработка со Македонскиот павилјон „Сите ритми на сонцето“ („All Rhythms of the Sun“).
Програмата ќе се одржи во „Јавна соба“ од 12 до 15 часот, а ќе ја отвори директорот на ЕКСПО 2027 Белград, Данило Јериниќ, со поздравно обраќање и презентација на промотивно видео.
Во рамки на настанот ќе бидат претставени програмите преку кои образовните институции, организациите, спортските федерации и партнерите можат да се вклучат во ЕКСПО 2027. Ќе се разговара и за можностите што изложбата ги нуди како деловна платформа за поврзување на економиите и создавање нови партнерства.
Во 13:30 часот ќе биде прикажано промотивното видео за Македонија, со кое на повеќе јазици се промовира македонскиот вински сектор.
Предвидена е и презентација посветена на туристичкиот сектор, со посебен фокус на излезниот туризам, како и можност за вмрежување меѓу претставници на ЕКСПО, туристички институции, даватели на услуги за влезен туризам и македонски агенции за излезен туризам.
Претходно, во 10 часот, ќе се одржи неформална средба со претставници на ЕКСПО, на која медиумите ќе имаат можност за интервју со директорот Данило Јериниќ. Потоа ќе следува прес-конференција на која ќе се обратат Јериниќ и комесарот на Македонскиот павилјон, Александар Велиновски.
ЕКСПО 2027 Белград е специјализирана изложба која има за цел да ги поврзе земјите, институциите, организациите и деловниот сектор и да отвори можности за нови партнерства, соработка и промоција во области како образованието, спортот, економијата и туризмот.