Соединетите Американски Држави се подготвени да одобрат трансфер на десет ракети-пресретнувачи „Патриот“ од тип PAC-2 GEM-T од Германија во Украина, откако истече законскиот рок за преглед во Конгресот.
Според известувањето испратено од Стејт департментот, ракетите имаат почетна цена од околу 29,6 милиони долари за сите десет единици, а бидејќи Германија првично ги купила од САД, неопходно било одобрение за нивен повторен извоз.
„Украина се стреми да ги набави овие системи за да ги зајакне своите капацитети за воздушна одбрана во услови на континуирани руски напади“, се вели во соопштението на Стејт департментот, каде се додава дека Киев веќе поседува ист вид муниција.
Предлогот беше доставен до Конгресот на 14 август, а по истекот на 30-дневниот рок за преглед, од Стејт департментот нагласија дека трансферот може да се случи веднаш.