Земјотрес со јачина од 4,3 степени според Рихтеровата скала го погоди морското подрачје северно од островот Евија во близина на Атина рано наутро во понеделник, соопштија надлежните власти. Засега нема пријавени повредени лица или предизвикана материјална штета.
Според податоците од Институтот за геодинамика при Националната опсерваторија во Атина, земјотресот се случил во 5:13 часот наутро по локално време, со епицентар на 9 километри југозападно од Прокопи и на длабочина од 16,4 километри.
Грчките сеизмолози појаснуваат дека овој потрес е директна последица на посилниот земјотрес со магнитуда од 5,2 степени по Рихтер кој се случи во неделата, а кој беше широко почувствуван во Атина и во други делови од централна Грција.
Претседателот на Организацијата за планирање и заштита од земјотреси (OASP), Ефтимиос Лекас, изјави за државната телевизија ЕРТ дека низата последователни потреси се одвива нормално и дека нема причина за загриженост кај населението. Тој додаде дека повеќе од 110 последователни потреси се регистрирани во областа од земјотресот во неделата.
Како мерка на претпазливост, локалните власти донесоа одлука основните училишта и локалното средно училиште во ова подрачје да останат затворени во текот на денот.