Британската влада се наоѓа во сериозна криза откако денеска оставка поднесе и шефот за комуникации на премиерот Кир Стармер, Тим Алан. Неговото заминување е дел од поширокиот бран оставки кои го тресат Даунинг стрит, предизвикани од контроверзното назначување на Питер Манделсон за нов амбасадор во САД.
„Чистка“ на Даунинг стрит за нов почеток Тим Алан, во своето официјално соопштение, посочи дека неговото повлекување е стратешки потег за доброто на владата.
„Одлучив да се повлечам за да дозволам изградба на нов тим на Даунинг стрит. Им посакувам на премиерот и на неговиот тим секаков успех“, изјави Алан.
Овој потег доаѓа само 24 часа по оставката на Морган МекСвини, шефот на кабинетот и најблизок соработник на Стармер. МекСвини ја презеде целата одговорност за „скандалот Манделсон“, признавајќи дека тој му препорачал на премиерот да го избере Питер Манделсон за амбасадор во САД – одлука која наиде на жесток отпор поради врските на Манделсон со покојниот сексуален престапник Џефри Епстин.
Стармер одбива да се повлече И покрај серијата оставки на неговите клучни луѓе, Кир Стармер не планира да си замине од функцијата. Портпаролот на Даунинг стрит децидно ги демантираше гласините за можна оставка на премиерот.
„Не. Премиерот се концентрира на работата што ја има пред себе. Тој продолжува со работата за спроведување промени низ целата земја“, соопштија од неговиот кабинет.
Денеска, премиерот одржа говор пред вработените на Даунинг стрит, повикувајќи на единство во овие тешки моменти. Тој порача дека политиката мора да остане „сила на доброто“ и ги охрабри своите соработници да продолжат со доверба кон спроведувањето на ветените реформи.
Иако официјалните лица тврдат дека Тим Алан сам избрал да се повлече, во Лондон се погласни се коментарите дека ова е обид на Стармер да го жртвува својот тим за да го зачува сопствениот авторитет по низата лоши проценки.