Нов топлотен бран го зафати европскиот континент, при што максимални температури над 30 степени Целзиусови се очекува денеска да почувствуваат речиси три од пет жители на Европа (без Турција), односно околу 340 милиони луѓе.
Истовремено, области во Европа во кои живеат вкупно повеќе од 135 милиони луѓе – главно во Франција, Италија, Шпанија и Велика Британија – денеска се очекува во одредени периоди од денот да бидат погодени од температури над 35 степени Целзиусови. Тоа претставува значително зголемување во споредба со претходниот ден, кога температури над 35 степени ги погодуваа најмалку 92 милиони луѓе.
Според анализите засновани на прогнозите на Германската метеоролошка служба и демографските проекции на Европската комисија, Европа и понатаму останува континентот со најбрзо зголемување на температурите во светот.
Најкритично во западниот и јужниот дел на континентот:
- Франција: Температури над 35 степени се прогнозираат во области со околу 50 милиони жители, зафаќајќи ги и североисточните делови кои претходно беа поштедени.
- Италија: Слични екстремни температури се очекуваат за околу 29 милиони луѓе, особено долж западниот брег, во долината на реката По, на југот и на островите.
- Шпанија: Топлотниот бран ќе зафати големи делови од Пиринејскиот Полуостров, изложувајќи околу 25 милиони луѓе на горештини над 35 степени.
- Велика Британија: Живата во термометрите се очекува да го надмине прагот од 35 степени за околу 23 милиони жители, главно во централните делови на Англија и во Лондон, додека земјата е на пат да го забележи најтоплото лето во историјата.