Париската полиција приведе десет лица под сомнение за организирање на обемна измама со билети во најпознатиот светски музеј, Лувр. Меѓу уапсените се наоѓаат вработени во институцијата и туристички водичи кои главно таргетирале кинески туристи преку продажба на лажни билети и пребукирање тури.
Акцијата на полицијата следела по пријава од администрацијата на музејот за забележани „неправилности“. При претресите се конфискувани 130.000 евра во готово, три возила, а замрзнати се и речиси 200.000 евра на банкарски сметки.
Од администрацијата на Лувр соопштија дека веќе е усвоен „структуриран план за борба против измамите“, кој вклучува низа правни, технички и контролни мерки за заштита на посетителите и угледот на институцијата.
Овој инцидент доаѓа во тежок период за музејот, кој се соочува со штрајкови на вработените, безбедносни пропусти по грабежот на крунските скапоцености во октомври и низа критики за зголемување на цените на билетите за 45 проценти за посетителите надвор од Европа.