Интернационалниот универзитет „Еуропа Прима“ денеска со свечен прв академски час ќе ја означи новата академска 2026/2027 година, но и почетокот на одбележувањето на две децении од своето основање.
Свеченоста ќе се одржи во 12 часот во Кинотеката на Македонија, каде што е најавено обраќање на министерот за дигитална трансформација Стефан Андоновски.
Добредојде на новата генерација студенти ќе им упати ректорот проф. д-р Александар Трајковски. Во рамки на настанот ќе бидат претставени и студенти кои во изминатата година добиле меѓународни признанија на филмски и театарски фестивали.
Проф. Златко Шумковски од Универзитетот во Келн ќе говори за можностите за унапредување на соработката меѓу Македонија и Германија во областа на дигиталните медиуми.
На свечениот академски час ќе присуствуваат и претставници на странски универзитети со кои „Еуропа Прима“ соработува преку програмата „Еразмус+“, како и гости од Фестивалот на Југоисточна Европа, кој Универзитетот го организира во Париз, Берлин и Вашингтон.
Настанот ќе заврши со свечено врачување на индексите на студентите од новата генерација.