Министерот за надворешни работи и надворешна трговија, Тимчо Муцунски, и министерот за трговија и интеграции на Казахстан, Арман Шакалиев, на заедничката прес-конференција во Скопје порачаа дека постои силна волја за надминување на предизвиците и зголемување на економската соработка меѓу двете земји.
Фокусот на средбата беше ставен на Вториот македонско-казахстански бизнис-форум, кој треба да послужи како мост за поврзување на бизнис-заедниците.
„Констатиравме дека сегашното ниво на економска размена не го одразува реалниот потенцијал меѓу двете земји. Но, се согласивме дека постојат конкретни и достижни можности тој јаз да го затвориме“, истакна Муцунски. Тој додаде дека Владата останува отворена за казахстански инвеститори, како во технолошко-индустриските развојни зони (ТИРЗ), така и во други сектори од нивен интерес.
Казахстанскиот министер Шакалиев, кој ја предводи делегацијата составена од претставници на деловниот, агроиндустрискиот и академскиот сектор, истакна дека целта на посетата е проширување на деловните контакти и воспоставување на конкретни области на соработка.