Украина и Европската Унија потпишаа договор за беспилотни летала, со кој ќе се обединат украинското знаење и европските индустриски капацитети со цел реализација на заеднички проекти и зголемување на производството.
Претседателката на Европската комисија, Урсула фон дер Лајен, која престојува во Киев по повод Денот на државноста на Украина, истакна дека договорот претставува важен чекор во продлабочувањето на соработката меѓу Украина и Европската Унија.
„Овој договор ќе ја комбинира украинската генијалност со индустриските капацитети на Европа“, рече Фон дер Лајен во своето обраќање.
Таа додаде дека Европската Унија може да ѝ понуди на Украина „огромен технолошки и индустриски капацитет“ и „безбедни и сигурни производствени погони“.
На Самитот на НАТО во Анкара, Украина претходно потпиша три слични договори со поединечни држави, но денешниот договор е првиот што ги опфаќа земјите-членки и компаниите од целата Европска Унија.
Во Киев денеска се одбележува Денот на државноста на Украина, а воедно се одржува и Самитот Украина – Југоисточна Европа. Украинскиот претседател Володимир Зеленски најави дека ќе ја одликува Урсула фон дер Лајен со Орден на Европа за нејзините „исклучителни лични заслуги за помагање на Украина во одбрана на нејзината независност и безбедност на цела Европа“.