Што ќе се случува денеска во Градски парк?

Министерството за здравство заедно со Здравствен дом-Скопје денеска во Градски парк кај Школка ќе ја одбележи Европската недела на имунизација, која од 22 до 26 април се одбележува по деветти пат во сите европски земји.

Министерството за здравствон продолжува да води посебна грижа за здравјето на децата. Оттаму потенцираат дека вакцинацијата како дел од превентивната заштита е особено важна затоа што медицински е докажано дека е најефикасната заштита од многу тешки заболувања.

По тој повод, денеска во Градскиот парк ќе се одржи културно-забавен настан, на кој дечињата и родителите ќе се информираат за бенефитите од вакцината преку промотивни материјали, забавни точки на деца од основни училишта и хорот Златно славејче. Целта е подигнување на свесноста за важноста на имунизацијата, бидејќи со тоа ќе ги заштитат своите деца од тешки заразни заболувања и последиците од тоа.-

Како што велат од Министерството, докажано е дека вакцинацијата е најисплатлива јавна здравствена превентивна мерка со која се елиминирани или редуцирани на минимум многу заразни болести. За Република Македонија успешната  вакцинацијата кај децата отсекогаш била приоритет и на ова поле бележи успеси со години наназад.

Во Република Македонија последен случај на дифтерија е забележан во далечната 1976 година. Исто така, за болеста вариола вера е постигната ерадикација (уништување) во 1978 година, а парализата е елиминирана од 2002 година во цел европски регион, вклучувајќи ја Македонија.

Во рамки на одбележувањето на Европската недела на имунизација се врши и теренска вакцинација со цел да се откријат што повеќе невакцинирани деца. Република Македонија со години наназад, како и минатата година, има висок просек на опфат со имунизација, кој изнесува над 95 проценти.