Човечки фактор пресуден за железничката несреќа во Велес

Системите за сигнализација  на пругата кај железничката станица „Рајко Жинзифов“  во близина на Велес каде што синоќа се судрија патнички и товарен воз функционирале беспрекорно и најверојатно  причината е човечки фактор, рече денеска на прес-конференција директорот на МЖ Транспорт а.д. Скопје Оливер Деркоски.

Во несреќата нема жртви и повредени, освен кондуктерот кој се здобил со полесни повреди, а е  причинета материјална штета чиј износ се уште се утврдува.

Според Деркоски, и покрај  првичните информации, не треба да се прејудицира и треба да се почека конечниот извештај од Комисијата која работи на расветлување на целиот случај, а кој се очекува да биде готов најдоцна задутре.

Несреќата, појасни директорот на МЖ Транспорт, се случила синоќа пред 18 часот на излез од станицата, при што патничкиот воз стоел, а товарниот воз поминувал низ станицата на другиот колосек. Дошло до приближување на возовите и удар од страна во вагоните, поради што дошло до извртување и исклизнување на вагоните.

- Товарниот воз се движел, а другиот воз тргнал, па застанал. Доброто во оваа ситуација е што застанал. Не можам  да прејудицорам, но веројатно тој момент, тргнувањето и застанување, е причината зошто се случи настанот, рече Деркоски.

При несреќата дошло до  извртување на еден товарен вагон и изместување на два, а по инерција од  ударот на останатиот дел од вагоните исклизната е и локомотивата.

-  Сите вагони се веќе вратени на пругата во станицата Рајко Жинзифов и моментно се подготвуваат  да бидат вратени  во работилницата, а  локомотивата, со оглед дека има тежина  од 120 тони и е потребно исклучување на контактната мрежа  на високиот напон, ќе потрае малку, односно се надеваме дека во текот на денов ќе се заврши и таа работа и оти ќе биде вратена безбедно во нашите работилници, наведе директорот на МЖ Транспорт.

Од МЖ Инфраструктура најавиле  дека оштетувањата што се настанати на пругата со промена на праговите и  напрсната шина, ќе се заврши во текот на денов  и оти сообраќајот ќе се нормализира во попладневните часови. 

Кај патничкиот  воз во кој во моментот на несреќата имало 150 патници нема оштетувања освен искршени стакла, а кај товарниот е оштетен вагонот во кој бил ударот и ќе се санира  во работилниците на МЖ Транспорт.

Според Деркоски, несреќа со судир на возови не се случила долго време, а дневно низ станицата Рајко Жинзифов поминуваат 30 - ина воза, 20 патнички и 10 товарни.

Во случај да се утврди дека причина за несреќата е човечки фактор, ќе се постапи  согласно прописите од законите за железнички систем и за бебзедност во железничкиот сообраќај, со кои се предвидени прекин на  договорот за вработување и надомест на настаната штета