Американски генерал: Авганистан е на работ на граѓанска војна

Шефот на здружениот штаб на американската армија, генерал Марк Мили, рече дека Авганистан е на работ на граѓанска војна, со закана за ново зајакнување на терористичките групи во таа земја.

„Мојата воена проценка е дека условите може да прераснат во граѓанска војна“, рече Мили во интервју за „Фокс њуз“ во саботата во воздухопловната база Рамштајн во Германија.

„Не знам дали Талибанците се способни да ја зацврстат власта и да воспостават владеење“, ​​додаде тој.

Затоа, терористичките групи би можеле да го искористат вакуумот за власт во Авганистан, предупреди Мили.

Заживување на тероризмот

Се стравува дека Ал Каеда може да се реорганизира и дека екстремистите од Исламската држава би можеле да го прошират своето влијание или дека безброј други терористички групи можат да се прошират.

„Може да забележите заживување на тероризмот во тој регион за 12, 24, 36 месеци. И ние ќе го следиме тоа”, додаде тој.

Повлекувањето на последните американски војници од Кабул минатата недела го означи крајот на воената мисија на Вашингтон и неговите сојузници во Авганистан по речиси 20 години.

Како главен аргумент за повлекувањето, администрацијата на Бајден наведува дека Ал Каеда е ефикасно размонтирана и повеќе не е способна да напаѓа цели во САД од Авганистан.

МАКФАКС