По хаосот за амандманите - Правда вели кога ВМРО ќе има предлог ќе има и средба

Министерството за правда е подготвено за средба, но кога ќе се одржи зависи од ВМРО-ДПМНЕ, која треба да достави свој предлог за клучните разлики за Предлог законот за јавното обвинителство што ќе бидат во согласност со европските препораки.

-Се чека ВМРО-ДПМНЕ да достави свој предлог за клучните разлики, кој ќе биде во согласност со европските препораки. Штом ВМРО-ДПМНЕ бидат спремни со предлог, ќе има средба. Зависи од нив, велат за МИА од Министерството за правда.

Последната средба меѓу претставници на власта и опозицијата на која бил разгледан законскиот текст за јавното обвинителство со кој треба да се реши идниот статус на СЈО, се одржала завчера.

-Со оглед на тоа што клучните разлики остануваат, двете страни се согласија консултациите за законот да продолжат. Уште еднаш потенцираме дека сите политички партии треба да дадат приоритет на европската перспектива на нашата држава, земајќи ги предвид препораките на Европската Унија и меѓународната заедница кои се однесуваат на владеење на правото и правната држава, а кои се клучни за отпочнување на преговори со Европската Унија, соопшти Министерство за правда.

Премиерот Зоран Заев изјави дека е изработена нова верзија на законот за јавно обвинителство во која, како што посочи, во одредени сегменти се прифаќаат голем дел од сугестиите на ВМРО-ДПМНЕ.

Во однос на барањето на опозицијата за исфрлање на „бомбите“ како доказ, премиерот рече дека тоа е прашање што е прифатено.

-„Бомбите“ или т.н. материјали за неовластено прислушување нема да бидат користени во доказна постапка во идното работење на Јавното обвинителство, кажа Заев. Појасни дека „бомбите“, што веќе се во судска постапка во 18-те предмети на СЈО, ќе продолжат и натаму да се користат, додека за предметите после 30 јуни 2017 година тие нема да бидат докази во постапките.

Заев рече дека очекува по овие промени процесот да успее и замоли тоа да се случи побргу поради парламентарната процедура. 

Инаку, претходно настана хаос околу амандманите на ВМРО. Мицкоски тврдеше дека се пратени, а Заев и Правда дека не стигнале на време.

Од Министерството за правда потврдија дека вечерта по завршувањето на тв дуелот меѓу Заев и Мицкоски, до нив пристигнале амандманите за законот за јавно обвинителство на ВМРО-ДПМНЕ.

Од друга страна, ВМРО-ДПМНЕ тврдат дека ги пратиле за време на работното време.

-  ВМРО-ДПМНЕ ги поднесе предлог  амандманите во насока на подобрување на предлог законот кој е клучен за правосудните органи во Република Македонија.ВМРО-ДПМНЕ смета дека на македонското правосудство им се потребни вистински реформи кои ќе бидат во согласност со меѓународното право, праксата на меѓународните судови и конвенциите заштита на човековите права, а не фингирани реформи за кои што се бори криминалниот картел на СДСМ, Заев и Десковска, велат од партијата.

Од друга страна, СДСМ тврдат дека не стигнале тогаш туку по дуелот Заев-Мицкоски.

- Во директен пренос Мицкоски лажеше дека поднеле амандмани во хартиена форма Христијан Мицкоски и ВМРО-ДПМНЕ се фатени во нова лага. На вчерашниот тв дуел, Мицкоски во директен телевизиски пренос лажеше пред граѓаните дека неговата ВМРО-ДПМНЕ поднела амандмани за Законот за јавно обвинителство. Мицкоски лажеше дека ВМРО-ДПМНЕ до Министерството за правда во хартиена форма поднела амандмани за Законот. Потоа, ВМРО-ДПМНЕ лажеше дека поднеле амандмани преку меил во 16:19. Што се однесува до амандманите поднесени електронски преку меил, истите стигнале во 20:19, откако беше откриено дека Мицкоски лаже за амандманите, велат од партијата.

Настана и расправија меѓу собранискиот спикер Џафери и Дескоска која бараше седница ако се усогласат мислењата, а Џафери рече дека не закажува до изборите за да не се искористи.