Министерот Филипче ја посети Општата болница во Кичево

Министерот за здравство д-р Венко Филипче во рамки на посетата на Општата болница во Кичево се сретна со директорот на таа јавна здравствена установа Билјана Настеска и со директорот на Здравствениот дом, Осман Сејдини.

На средбата лекарите кои работат во кичевските здравствени установи, ги кажаа проблемите со кои тие се соочуваат секојдневно при нивното работење со пацентите. Поплаките беа главно во сферата на недостиг на соодветни простории, како и немање доволна соодветна опрема за работа.

Министерот Филипче по средбата ги посети просториите на новата зграда која е во градба, но и старите објекти каде работат лекарите во Кичево.

Тој по средбата кратко изјави дека е дојден во болницата во Кичево за да ја скенира ситуацијата и да види што во моментот е најприоритетно за да помогнат. Посочи дека не може сите проблеми да бидат решени веднаш и дека ќе ја согледаат ситуацијата.

Вети дека набргу ќе дојде комисија за да види до каде и како што побрзо да се дозаврши новиот објект на болницата кој веќе подолг период е во градба.