Јованоски: Енергетски ефикасни фасади на домовите и училиштата и квалитетнои уличпно осветлување

Кандидатот за градоначалник на Прилеп од СДСМ и коалицијата, Илија Јованоски на денешната прес-конференција во прилепската населба „Точила“ каде е комплексот згради за колективно домување рече дека во својата програма има мерки и планови за урбан град и за урбанизација на населените места. Тој најави дека со средства од европските фондови ќе се инвестира во енергетска ефикасност на фасадите на зградите.

-Во соработка со Европската банка за обнова и развој и со средства од ИПА фондовите на Европската Унија, како и други донатори, ќе ја заокружиме финансиската конструкција и ќе инвестираме во енергетска ефикасност на приватните колективни објекти, на индивидуалните станбени објекти во Прилеп и околните населени места. Индустриските објекти, како и објектите кои се во надлежност на локалната и централната власт, ќе имаат можност да добијат енергетски ефикасни фасади и квалитетно и ефикасно осветлување, рече Јованоски.

Јованоски вети дека и училиштата ќе добијат енергетски ефикасни фасади, а прилепчанни квалитетно улично осветлување.

-Сите училишта и градинки во општината ќе добијат енергетско-ефикасни фасади и покривни решенија. Ќе се изврши и замена на осветлувањето со енергетско-ефикасно осветлување со користење на ЛЕД диодни светилки. Јавното осветлување во градот ќе биде изведено со фото-волтаични системи и ЛЕД диоди и со сензори за синхронизација со дневната светлина. Ќе имаме светли улици и осветлен град, рече Јованоски.

Барајќи ја довербата на прилепчани, Јованоски најави намалување на трошоците на граѓаните за електрична енергија и светилки, а во пакет со гасификацијата, ќе воведе и централно греење.

-Оваа мерка значително ќе влијае врз намалување на трошоците за енергија, а ќе спречи и загадувањето на градот. Сите овие проекти, ќе бидат реализирани не со пари на граѓаните или од општинскиот буџет, туку исклучиво со мои заложби и со заложби на новиот состав на Советот, од странските фондови и донатори, рече Јованоски барајќи граѓаните на 15 октомври да го заокружат бројот 13 за, како што рече, да има живот во Прилеп за сите.