За три месеци 13.299 луѓе кажале „Ало докторе“
Од 15 септември кога почна да функционира телефонската линија (02/15 123) „Ало докторе“, досега 13.299 луѓе се јавиле да побараат медицински совет. Од 8 декември до синоќа до 22 часот на линијата за здравствен совет се јавиле 722 луѓе.
Достапни за здравствен совет се 22 доктори, а јавувањата се од граѓани од сите градови на Македонија. На сите лица кои се јавија на телефонската линија „Ало докторе“, им е дадена медицинска помош преку здравствен совет и соодветна симптоматска терапија, соопштија од Здравствен дом - Скопје.
Најчесто јавувањата на телефонската линија, како што се наведува, се за медицинска помош со широк спектар на најразлична симптоматологија, кардиоваскуларни и респираторни симптоми, најчесто за зголемен крвен притисок, проблеми со зголемена телесна температура, кашлица, настинки и симптомна болка.
Секој ден од 18 до 22 часот во кол Центарот „Ало докторе“ за медицински совет се дежурни и достапни за здравствен совет директорите на јавните здравствени установи. Денеска од 18 до 22 часот дежурен ќе биде доктор Илијаз Исмаили, директор на Клиниката за очни болести, а утре доктор Ленче Неловска од Геронтолошкиот завод „13 ноември“.
На 17 декември дежурен на линијата ќе биде доктор Мендух Јегени, директор на Специјалната болница за гинекологија и акушерство Чаир, на 18 декември доктор Живка Јордановска од Заводот за рехабилитација на слух, говор и глас, на 19 декември доктор Оливер Зафировски, директор на Институтот за белодробни заболувања кај децата Козле, на 20 декември доктор Идриз Неџипи од Психијатриска болница Скопје, а на 21 декември доктор Оливера Давчева од ЈЗО Здравствена станица Железара Скопје.
Оцени ја веста
Редакцијата на Press24 не сноси никаква одговорност за коментарите. Бидејќи се генерираат преку Facebook за нив важат правилата и условите на социјалната мрежа