Потребни се 550 милиони долари помош за жителите на Појасот Газа

Обединетите нации и палестинската Влада ги повикаа меѓународните донатори да обезбедат 550 милиони долари помош за стотици илјади жители на Појасот Газа по седумнеделната офанзива на Израел.

На 12 октомври во Каиро ќе се одржи донаторска конференција за Појасот Газа.

- Штетите и уништувањето се без преседан во Појасот Газа, изјави Џејмс Роули, хуманитарен координатор на ОН за палестинската територија, истакнувајќи дека кризата е далеку од завршена.

Според Роули и палестинскиот вицепремиер Мухамед Мустава хуманитарните потреби за Газа изнесуваат 550 милиони долари неопходни за обезбедување помош во храна, пристап до чиста вода за пиење, здравствена заштита и образование.

Израел на 8 јули почна офанзива врз Појасот Газа како одговор на ракетните напади на Хамас и други милитантни организации во Газа. Според ОН убиени се 2.100 Палестинци, меѓу кои 70 проценти се цивили. На израелска страна загинаа 67 војници и шестмина цивили.