Државниот завод за ревизија изразил неповолно мислење за реалноста и објективноста на финансиските извештаи на Националната установа Албански театар – Скопје за 2024 година, додека за усогласеноста со законската регулатива, упатствата и воспоставените политики е дадено мислење со резерва.
Ревизијата на сметката на основниот буџет (603) утврдила повеќе слабости во финансиското работење и управувањето со средствата на установата. Меѓу нив се слабости во процесот на попис на средствата и изворите на средства, невоспоставена материјална евиденција за материјалните средства, како и евидентирање градежни објекти без обезбеден акт за сопственост.
Ревизорите констатирале дека дел од материјалните средства и понатаму се водат како средства во подготовка, иако за нив е обезбедено одобрение за употреба. Дополнително, утврдени се недостатоци во постапките за набавка, прием и задолжување со материјали и ситен инвентар, како и слабости во евиденцијата за полно работно време.
Во извештајот е наведено и дека се намирувале обврски по проекти од претходни години, без за тоа да бидат предвидени средства во тековниот годишен план за работа.
Во делот „Нагласување прашања“, ревизијата укажува на нерегулиран начин на користење на недвижни и движни ствари, функционирање на Управниот одбор без законски утврдениот број членови, прашања поврзани со систематизацијата на работните места, користењето на паркинг-просторот наменет за публиката, како и тековни судски постапки.
Утврдено е и дека постојат слабости во системот на внатрешни контроли, меѓу кои недонесени интерни процедури за значајни процеси, несистематизирано работно место за раководител на финансиската служба и неназначени лица за ex-ante и ex-post финансиска контрола.
Државниот завод за ревизија издал препораки за надминување на утврдените состојби и подобрување на работењето на установата.
Од Националната установа Албански театар, како што наведува ДЗР, е доставен допис во кој е наведено дека одговорното лице нема забелешки на нацрт-извештајот на државниот ревизор.